Presidenti italian, Sergio Mattarella, është rizgjedhur President i vendit për një mandate të dytë shtatëvjeçar, duke i dhënë fund ditëve të ngërçit politik nga liderët e partive që rrezikuan të gërryejnë besueshmërinë e vendit.

Mattarella fitoi në raundin e tetë të votimit të shtunën, kur fitoi minimumin e 505 votave të nevojshme, shkruan Reuters, transmeton portal arbresh.info

Në Parlament shpërthyen duartrokitje, duke bërë që kryetari i Dhomës së Deputetëve të ndërpresë leximin me zë të fletëvotimeve. Numërimi më pas rifilloi, me Mattarella që vazhdoi të fitonte 759 vota.

Më herët, ligjvënësit iu lutën Mattarellës, 80 vjeç, i cili kishte thënë se nuk donte një mandat të dytë, të ndryshonte mendje dhe të pranonte rizgjedhjen nga ligjvënësit në Parlament dhe delegatët rajonalë.

Mandati i Mattarella përfundon më 3 shkurt. Rizgjedhja e tij pasoi ditë të tëra përpjekjesh të pafrytshme nga liderët politikë për të arritur një konsensus për një kandidat tjetër.

Mattarella kishte shërbyer si gjyqtar në Gjykatën Kushtetuese të vendit nga viti 2011 deri në zgjedhjen e tij si kreu i shtetit më 31 janar 2015./arbresh.info/